Сасновы бор 2022 год

У ліпені 2022 года ў лясным масіве каля вул. Парнікавай і Філімонава ў Партызанскім раёне адбылося адкрыццё экалагічнай сцежкі «Сасновы бор». Сцежка даўжынёй 1,1 км праходзіць уздоўж аднайменнай станцыі Дзіцячай чыгункі. Яна спадабаецца і дарослым, і дзецям.

Для маленькіх наведвальнікаў прадугледжаны пазнавальныя інфармацыйныя стэнды, з дапамогай якіх можна, гуляючы, даведацца шмат новага пра мясцовыя расліны і жывёльны свет. Каля станцыі ўсталявалі драўлянае дзіцячае абсталяванне. Для аматараў спорту ёсць валейбольная пляцоўка з пяшчаным пакрыццём і вулічныя трэнажоры.

Сцежка прыцягне ўвагу і аматараў шашак: адзін з элементаў добраўпарадкавання – гульнявое поле, расчэрчанае на вялікім пні, а таксама драўляныя шашкі. Уздоўж усёй сцежкі ўстаноўлены лаўкі для адпачынку.

Запрашаем усіх ахвотных прагуляцца па экалагічнай сцежцы «Сасновы бор»!